Бид бүгдээрээ л завгүй шинэ хэл сурах, код бичиж сурах, мэргэжлээрээ өсөх зэрэг олон зүйл бодож хийж байгаа байх. Гэвч бидний ихэнх нь “их хичээж байгаа” мөртлөө нэг л байрандаа зогсоод байгаа мэт мэдрэмж авдаг уу?
Тэгвэл энэ нийтлэлээрээ сурах арга барилын нэг болох “Паретогийн зарчим” буюу 80/20-ийн дүрмийн талаар тайлбарлаж, санал болгож байна.
Паретогийн зарчим гэж юу вэ?
1896 онд Италийн эдийн засагч Вилфредо Парето нэгэн сонирхолтой зүй тогтлыг анзаарсан. Тэр нь Италийн нийт газрын 80%-ийг хүн амын ердөө 20% нь эзэмшдэг гэх баримт байв. Энэхүү зүй тогтол нь зөвхөн эдийн засагт ч биш, амьдралын бүх салбарт үйлчилдэг болох нь батлагдсан.
Математик утгаараа ч үүнийг хүчний хуулийн хамаарал (Power Law) гэж нэрлэдэг:
Үүнийг энгийнээр тайлбарлавал: Үр дүнгийн 80% нь ердөө 20%-ийн хичээл зүтгэлээс гардаг.
Жишээ нь:
1. Гадаад хэл сурахад:
Англи хэлэнд 170,000 гаруй үг бий. Гэтэл өдөр тутмын ярианы 80% нь ердөө хамгийн түгээмэл 2,000-3,000 үгэн дээр тогтдог бөгөөд толь бичгийг бүхэлд нь цээжлэх шаардлагагүй. Тэрхүү “алтан 20%”-ийг эзэмшсэн байхад та чөлөөтэй ярьж чадна.
2. Програмчлал ба Технологид:
Програмчлалын хэл бүрт мянга мянган сан (libraries) болон функц бий. Гэвч бодит төсөл дээр тэдгээрийн ердөө 20%-ийг л цаг ямагт ашигладаг бөгөөд үлдсэн 80%-ийг хэрэг болох үед google-дэх зэрэг бусад эх сурвалжаас мэдээлэл авахад л хангалттай.
3. Шалгалтад бэлдэхэд:
Сурах бичгийн бүх хуудсыг нэг бүрчлэн унших биш, өмнөх жилүүдийн шалгалтын асуултууд болон үндсэн концепцуудыг (20%) барьж авбал шалгалтын онооны 80%-ийг авах боломжтой.
Яагаад бид үүнийг хэрэгжүүлдэггүй вэ?
Бидний тархи хааяа их ажиллахыг амжилттай андуурдаг. Бид 10 цаг ширээний ард суухыг “үр дүнтэй байна” гэж боддог ч, үнэндээ тэр хугацааны 8 цагт нь бид үр дүн багатай 80%-ийн ажилд (сошиал медиа үзэх, хэтэрхий жижиг деталь хөөх, гоёл чимэглэл хийх) хамаг эрч хүчээ бардаг.
Энийг уншаад энэ аргаад нэг туршаад үзье гэж бодож байвал энэ 3 алхмыг хийгээд үзээрэй:
- Жагсаалт гарга: Таны сурч буй зүйлд байдаг хамгийн чухал, суурь 5-хан ойлголтыг нэрлэ. (Жишээ нь: Програмчлал сурч байгаа бол Logic, Data structures, Loops гэх мэт).
- Шүүлтүүр тавь: “Энэ мэдээлэл надад бодит төсөл хийхэд шууд хэрэг болох уу?” гэж асуу. Хэрэв үгүй бол түр хойш тавь.
- 80%-ийг золиосло: Төгс байх гэж хичээхээ зогсоо. Эхний 20%-ийн хичээл зүтгэлээр 80%-ийн үр дүнд хүрсэн бол шууд дараагийн шат руу шилж. Үлдсэн 20%-ийн төгс гүйцэтгэлд хүрэхийн тулд танаас 80%-ийн асар их хүч шаардагдах болно. Үүнийг “Diminishing Returns” буюу өгөөж буурах хууль гэдэг.
Энэ нийтлэл танд таалагдсан бол TEE Education-ийн бусад зөвлөгөө, нийтлэлүүдийг уншаад үзээрэй!
