D.Ankhbayar

• 2025-02-15
• education, технологи

Кино салбар дэх хиймэл оюун ухаан хувьсгал уу, аюул уу?

Хиймэл оюун ухаан кино үйлдвэрлэлийн салбарыг өөрчилж, кино бүтээх, засах, маркетинг хийх зэрэг ажлуудыг шинэлэг аргаар хийдэг болжээ. AI хэдий үр ашгийг нэмэгдүүлж, шинэлэг санааг нэвтрүүлж байгаа ч кино найруулагч, жүжигчид, зохиолчдын дунд ажлын байраа алдах эсэх эрсдэл үүсгэж, нөгөө талаас урлагийн бүтээлч байдлын талаар олон нийтийн дунд маргаан дагуулж байна.

Кино бүтээхэд AI хэрхэн ашиглагдаж байна?

AI нь кино зохиол бичихээс эхлээд тусгай эффект хүртэл олон талбарт нэвтэрчээ. ScriptBook зэрэг хэрэгслүүд нь кино зохиолын чанарыг урьдчилан таамаглах чадвартай бол AI ашигласан CGI нь боломжгүй үзэгдлүүдийг бодит мэт дүрсэлж чадна.

The Irishman (2019) кинонд AI ашиглан Роберт Де Ниро, Аль Пачино нарыг олон насаар залуужуулсан.

Мэдээж AI нь кино засварлалт, боловсруулалтанд чухал үүрэгтэй. Adobe Sensei зэрэг AI хэрэгсэл нь өнгө тохируулах, үзэгдлийн шилжилтийг автоматаар хийх боломжтой бол Deepdub платформ олон хэл дээр дуу оруулалтыг нарийн тохируулах замаар дуу хоолойг бодит мэт хувиргах боломж олгодог.

Rogue One: A Star Wars Story (2016) кинонд AI ашиглан жүжигчин Питер Кушингийн дүрийг дахин бүтээсэн нь нас барсан жүжигчдийг AI ашиглан “амилуулах” ёс зүйн асуудлыг хөндсөн.

Маркетинг, Үзэгчдийг татахад AI-ийн нөлөө

Netflix, Disney+ зэрэг стриминг үйлчилгээ үзүүлэгчид AI ашиглан хэрэглэгчдийн сонирхлыг судлаад тохирох контентыг санал болгодог. Жишээ нь Morgan (2016) киноны трейлерийг AI ашиглан бүтээсэн нь машин сургалт хэрхэн сонирхолтой хэсгүүдийг тодорхойлон маркетингийг оновчтой болгох боломжтойг харуулсан.

Давуу болон Сул талууд

Давуу талууд:

• Зардалд хэмнэлттэй – Хүний оролцоо бага, зардлыг бууруулна.
• Тусгай эффект – AI ашигласан CGI технологи нь илүү бодит дүрслэл бий болгодог.
• Хэрэглэгчдэд үйлчилгээ – Стриминг платформууд AI ашиглан хувь хүний сонирхолд нийцсэн кино санал болгодог.

Сул талууд:

• Ажлын байрны хомсдол – AI ашигласнаар кино editer, дуу оруулагч, зохиолчдын ажлын байр буурч болзошгүй.
• Ёс зүйн асуудал – Нас барсан жүжигчдийн дүрийг AI ашиглан дахин бүтээх нь хууль, ёс зүйн эргэлзээтэй.
• Урлагийн бүтээлч байдлын алдагдал – AI зохиосон кино зохиол, хөгжим нь хүний сэтгэл хөдлөлийг бүрэн илэрхийлж чадахгүй байх магадлалтай.

Дүгнэлт

AI кино урлагт хувьсал авчирч байгаа хэдий ч уламжлалт бүтээлч ажлын байрнуудыг орлож болзошгүй аюул дагуулж байна. Кино үйлдвэрлэл дэх AI нь технологийн давуу талыг ашиглахын зэрэгцээ кино уран бүтээлчдийн эрхийг хамгаалах бодлоготой байх хэрэгтэй байх. Хиймэл оюун ухаан ер нь бүтээлч салбарыг бүрэн орлох гэхээсээ илүү түүнийг дэмжих хэрэгсэл байх нь чухал юм.