Game Dev дахь GenAI: Түр зуурын халуурал байсан уу, эсвэл бодит хязгаартаа хүрэв үү?

Сүүлийн хэдэн жилд тоглоом хөгжүүлэлтийн салбар бараг бүхэлдээ AI-ийн тухай ярьж байлаа. Том студиэс эхлээд жижиг стартап хүртэл “GenAI ашиглаад зардлаа бууруулна”, “контентоо илүү хурдан бүтээнэ”, “хөгжүүлэлтийн хугацаагаа багасгана” гэсэн амлалтууд хаа сайгүй сонсогдож байсан.

Гэхдээ 2026 оны эхээр гарсан шинэ судалгаануудыг харахад сонирхолтой дүр зураг ажиглагдаж байна. AI хэрэгслүүдийн хэрэглээ өссөөр байна гэж олон хүн бодож байсан ч бодит байдал дээр зарим хөгжүүлэгчид тэдгээрээс аажмаар холдож эхэлжээ.

Энэ нь "AI дууслаа" гэсэн үг биш. Харин эсрэгээрээ, салбар анхны хөөрөл, маркетингийн шуугианаас гарч илүү бодит үнэлгээ хийж эхэлж байгаагийн шинж юм.

Халуурал бууж эхэлсэн нь

Шинэ технологиуд ихэвчлэн нэг ижил замаар явдаг. Эхэндээ бүх зүйл гайхамшигтай мэт харагдана. Дараа нь бодит хэрэглээ, бодит асуудлуудтай тулгарахад хүмүүс илүү шүүмжлэлтэй ханддаг болдог.

GenAI яг энэ үе шатандаа орж байна.

Game Developer Collective-ийн судалгаагаар 2024 оны төгсгөлд хөгжүүлэгчдийн 24% нь AI хэрэгсэл ашиглаж байсан бол 2025 оны эхээр энэ үзүүлэлт 36% болж өссөн байна. Харин 2026 оны эхний хагаст 29% хүртэл буурчээ.

Энэ нь хүмүүс AI-г бүр мөсөн орхиж байна гэсэн үг биш. Харин хаана хэрэгтэй, хаана хэрэггүй вэ гэдгийг илүү бодитоор үнэлж эхэлсний илрэл юм.

Чанар ба өртгийн бодит асуудал

AI-ийн хамгийн том амлалт нь хурд болон хэмнэлт байсан.

Гэвч практик дээр хөгжүүлэгчид өөр асуудлуудтай тулгарчээ.

Судалгаанд оролцсон хүмүүсийн 47% нь AI ашиглах нь тоглоомын чанарт сөрөг нөлөө үзүүлдэг гэж үзсэн байна. Харин ердөө 11% нь эерэг нөлөөтэй гэж хариулжээ.

Шалтгаан нь ойлгомжтой. AI-ээр үүсгэсэн код, зураг, текстүүд хурдан гардаг ч ихэнхдээ нэмэлт засвар шаарддаг. Заримдаа бүр гараар эхнээс нь хийхээс илүү их цаг зарцуулах тохиолдол ч бий.

Мөн олон хөгжүүлэгч AI-гаар бүтээсэн контентуудыг хоорондоо төстэй, нэг хэвийн болгодог гэж шүүмжилдэг. Тоглоомын онцлог өнгө төрх, бүтээлч шийдлүүд алдагдах эрсдэл бий гэсэн үг.

Зардлын хувьд ч ижил дүр зураг харагдсан. 2025 онд хөгжүүлэгчдийн 27% нь AI их хэмжээний хэмнэлт авчирна гэж найдаж байсан бол 2026 онд энэ үзүүлэлт 21% болж буурчээ.

Учир нь AI-ийн гаргасан алдааг засах, кодыг шалгах, хууль эрх зүйн эрсдэлийг удирдах, одоо байгаа системтэй нэгтгэх зэрэг ажил нь өөрөө нэлээд их цаг, мөнгө шаарддаг болох нь харагдсан.

Улс орон бүр ижил хандлагатай биш

AI-ийн хэрэглээ бүс нутаг бүрт өөр байна.

Барууны орнуудад олон хөгжүүлэгч чанар болон зохиогчийн эрхийн асуудалд болгоомжилж байгаа хэвээр байна. Мөн AI-ийн улмаас ажлын байр цөөрөх эрсдэлд санаа зовдог хүмүүс ч цөөнгүй.

Харин Япон зэрэг Азийн зах зээлд AI-ийн хэрэглээ илүү өндөр хэвээр байгаа. Энд гол зорилго нь бүтээлч ажлыг орлуулах биш, харин хүн хүчний дутагдлыг нөхөх, үйлдвэрлэлийн процессыг автоматжуулах явдал юм.

Нөгөө талаас Google зэрэг том технологийн компаниуд AI-г ашиглахаа больсон биш, харин илүү тодорхой ажлуудад төвлөрүүлж байна. Жишээлбэл:

• Олон хэл дээрх орчуулга

• Автомат плэйтэст

• Баланс шалгах

• Давтагддаг QA процессууд

• Контентын ангилал, шүүлт

Өөрөөр хэлбэл AI-г бүх асуудлын шийдэл гэж харахаа больж, тусгай зориулалтын хэрэгсэл гэж ашиглаж эхэлжээ.

Яагаад тоглоомын үндсэн дизайн дээр AI давамгайлж чадахгүй байна вэ?

Тоглоом бол үндсэндээ дүрэм, логик, урьдчилан тооцоолох боломжтой систем дээр ажилладаг.

Харин өнөөгийн GenAI болон LLM-үүд магадлал дээр суурилдаг. Өөрөөр хэлбэл нэг асуултад өөр өөр үед өөр хариулт өгөх боломжтой.

Энэ ялгаа нь тоглоомын үндсэн механик дээр AI-г найдвартай ашиглахад хүндрэл учруулдаг.

Нэрт тоглоом дизайнер Фрэнк Лантцын хэлснээр, AI сүүлийн хэдэн жилд асар хурдтай хөгжсөн ч өнөөдрийг хүртэл зөвхөн AI дээр тулгуурласан, салбарыг бүхэлд нь өөрчилсөн шинэ төрлийн тоглоом хараахан гарч ирээгүй байна.

Технологийн асуудлаас гадна зохиогчийн эрхийн маргаан, дата төвүүдийн эрчим хүчний хэрэглээ, GPU-ийн үнэ зэрэг хүчин зүйлүүд ч хөгжүүлэгчдийг илүү болгоомжтой хандахад хүргэж байна.

Тэгвэл AI-ийн ирээдүй юу вэ?

Миний харж байгаагаар хамгийн чухал дүгнэлт нь нэг зүйл.

AI тоглоом хөгжүүлэлтээс алга болж байгаа юм биш.

Харин салбар анхны хэт хүлээлтээсээ гарч байна.

Өнөөдөр хөгжүүлэгчид AI-г хаана ашиглах нь үр дүнтэй вэ гэдгийг илүү сайн ойлгож эхэлжээ. Орчуулга, автомат тест, контентын ангилал зэрэг давтагддаг ажлуудад AI маш хэрэгтэй хэвээр байна.

Харин тоглоомын гол санаа, дизайн философи, үндсэн архитектур, бүтээлч шийдвэрүүдийг AI-д бүрэн даатгах нь одоохондоо бодитой шийдэл биш хэвээр байна.

Товчхондоо бид "AI-г бүх зүйлд ашиглая" гэсэн үеэс "AI-г зөв газарт нь ашиглая" гэсэн илүү эрүүл инженерчлэлийн үе рүү шилжиж байна.

Дараагийн нийтлэлээр тоглоомын автомат плэйтэстэд AI-г хэрхэн ашиглаж болох талаар практик жишээ, кодтой нь хамт хуваалцъя.