
Дата төвүүдийн нууц: Бидний утас болон Хиймэл оюуны ард юу нуугддаг вэ?

О.Дэлгэрмаа
Багш


О.Дэлгэрмаа
Багш
Бид гар утсаараа хиймэл оюунаас (AI) гэрийн даалгавраа асууж, YouTube-ээс бичлэг үзэж, видео тоглоом тоглох дуртай. "Үүлэн" (Cloud) технологи гэдэг нэр бас их гоё сонсогддог тийм үү? Ямар нэгэн хүнд биет зүйл байхгүй, зүгээр л агаарт хөвж байдаг юм шиг.
Гэвч бодит байдал дээр бидний товчлуур дарах бүрийн цаана дэлхийн өнцөг булан бүрд байрлах аварга том, гэрэлтсэн серверийн өрөөнүүд буюу Дата төвүүд тасралтгүй ажиллаж байдаг. Технологи бидний амьдралыг ямар гайхалтай хялбар болгож байгааг бид мэднэ. Харин тэрхүү гайхамшгийг бүтээхийн тулд ард нь ямар cорилтууд байдаг, инженерүүд үүнийг хэрхэн ухаалгаар шийдэж байгааг сонирцъё!

Таны тоглоом тоглож байхад компьютер чинь халаад, сэнс нь чанга дуугараад эхэлдгийг анзаарсан уу? Дата төв гэдэг нь яг ийм хүчирхэг компьютеруудыг (серверийг) хэдэн арван мянгаар нь эгнүүлсэн аварга том "тархи" юм.
Тэд секунд ч амрахгүйгээр бидний хүсэлтийг биелүүлж байдаг учраас асар их дулаан ялгаруулдаг. Тиймээс инженерүүд эдгээрийг хэт халахаас сэргийлж хөргөх систем ашигладаг байна.
Энэ бүхнийг хараад "Өө, тэгвэл бид технологи хэрэглэхээ болих ёстой юм байна" гэж ойлгож огт болохгүй! Орчин үеийн инженерүүд үүнийг аль хэдийн маш ухаалгаар шийдээд эхэлчихсэн байгаа:

Байгалийн хөргөлт: Microsoft зэрэг компаниуд серверүүдийг далайн гүнд байрлуулж, байгалийн хүйтэн усаар хөргөх туршилтыг амжилттай хийсэн. Мөн сэрүүн уур амьсгалтай орнуудад дата төв барьж, байгаль орчинд ээлтэй байдлаар ажиллуулж байна.
Хаягдал дулааныг дахин ашиглах: Зарим улсад дата төвөөс ялгарч буй халуун агаар, усыг хотынхоо орон сууцнуудыг халаахад ашиглаж байна. Энэ бол технологи байгалийг сүйтгэх биш, харин хоёулаа зохицон орших гайхалтай жишээ!
Илүү ухаалаг код, хэмнэлттэй чип: Программистууд нэг үйлдлийг хийх гэж асар их эрчим хүч үрэхгүйн тулд илүү цэгцтэй, хурдан алгоритм (Green Coding) бичиж сурч байна.

Технологи бол хүн төрөлхтнийг урагшлуулж буй хамгийн том хөдөлгүүр. Гагцхүү бид үүнийг хэрхэн ухаалгаар, үр дүнтэй ашиглах вэ гэдэг нь чухал юм.
Хэрэгцээгүй олон зуун давхардсан зураг, видеонуудаа цэвэрлэх, хиймэл оюуныг зөв зорилгоор, оновчтой асуултаар ашиглах зэрэг жижигхэн зуршил ч гэсэн дижитал ертөнцийг илүү цэвэр, үр ашигтай болгоход хувь нэмэр оруулна.
Магадгүй ирээдүйд Монголынхоо эрс тэс сэрүүн уур амьсгалыг ашиглан дэлхийд гайхагдах "Ногоон дата төв" эсвэл эко системийг яг одоо код бичиж сурч буй манай сурагчид бүтээх биз ээ!